La Regjon Friûl Vignesie Julie e l'Istitût Nazionâl di Oceanografie e di Gjeofisiche Sperimentâl - OGS (Dipartiment Centri Ricercjis Sismologjichis - CRS) a son presints sul teritori de regjon Friûl Vignesie Julie cun dôs rêts di stazions permanentis GNSS: la rêt "A. Marussi" e la rêt FReDNet (Friuli Regional Deformation Network). I doi ents, in gracie des sore ditis infrastruturis, a furnissin doi servizis di corezion diferenziâl pal posizionament di precision in timp reâl sul teritori regjonâl.
La Regjon FVJ e à inviât tal 1997 la costituzion de Rêt GPS "A. Marussi" cun chê di realizâ une infrastruture gjeodetiche in stât di furnî supuart tecnologjic a operazions di rilêf topografic e catasticâl e al ûs di sistemis avanzâts te determinazion di elements gjeografics di logâ in mût automatic su la cartografie regjonâl. La Rêt GPS de Regjon FVJ e à rapresentât dal biel principi un imprest essenziâl par ducj i tecnics regjonâi e privâts che par competence a scuegnin realizâ misurazions topografichis urgjentis e dispedidis o ben, plui semplicementri, localizâ elements rilevants pe gjestion e pe planificazion dal teritori. E je ancje stade e ancjemò e je fondamentâl te realizazion e tal continui inzornament de Cjarte Tecniche Regjonâl Numeriche (CTRN).
L’OGS, in gracie dai dâts furnîts da la rêt FReDNet, si propon di davuelzi lis ativitâts di ricercje sientifiche par miorâ il model gjeodinamic de aree regjonâl pe caraterizazion dai procès tetonics regjonâi e di areis tra lis plui critichis dal pont di viste sismic. Un dai obietîfs di FReDNet al è chel di furnî dâts di deformazion dal teren di alte cualitât e, par cheste reson, i sîts permanents di chê rêt a sodisfin specifics recuisîts di visibilitât de costelazion satelitâr, di instalazion de antene GPS (par solit su crete che e ven fûr) e gjeologjics. Te sfere de ricercje aplicade FReDNet al à di obietîf la sperimentazion, il svilup e la distribuzion, sul teritori regjonâl, di servizis di posizionament in timp reâl fondâts su tecnologjie satelitâr GNSS (GPS e GLONASS) daûr des modalitâts plui difondudis di corezion diferenziâl.

La Regjon Friûl Vignesie Julie e l’OGS a àn sotscrit daûr de L.R. 27 di Dicembar 1991 n. 63, une convenzion pal sgambi sore nuie di dâts di caratar cartografic e teritoriâl cence finalitât di civanz e cun fins di interès public.
Chê Convenzion e je stade integrade cuntun At Adizionâl dulà che i Ents si impegnin a:

- colaborâ te sfere dal sgambi di dâts GPS/GNSS regjistrâts da lis rispietivis rêts GPS/GNSS permanentis, tal mantigniment de funzionalitât des rêts e dai rispietîfs servizis, e tal miorament des infrastruturis strumentâls di monitoraç GPS/GNSS gjestidis di lôr;
- definî e meti in vore un protocol di sgambi di distribuzion di dâts GPS/GNSS in timp reâl (corezions diferenziâls) pe furnidure dai servizis di posizionament di precision in timp reâl, daûr des modalitâts GPS RTK e VRS, o ecuivalentis, tal teritori de regjon Friûl Vignesie Julie;
- colaborâ par mantignî o miorâ i servizis di posizionament za realizâts te sfere areâl dal teritori de regjon Friûl Vignesie Julie, daûr des modalitâts GPS-RTK e VRS, o ecuivalentis.

Cun chê di realizâ un servizi di posizionament GNSS integrât sul teritori regjonâl, orepresint i centris di calcul di Regjon FVJ e dal OGS a cjapin sù e a distribuissin su internet a mieç dal protocol NTRIP, dutis lis corezions diferenziâls in modalitât RTK Singule Base, di dutis dôs lis rêts (A. Marussi e FreDNet).
Lis soluzions di rêt, tant che VRS e FKP, a son invezit gjeneradis e distribuidis separadementri di ogni centri di calcul su la fonde dai dâts de rêt di partignince. In cheste maniere, si garantissii ae utence des rêts un supuart afidabil (ridondance dai servizis e dai server di calcul e di distribuzion) e eficient (cuvierture capilâr dal teritori ancje cul servizi di singule stazion).
I servizis in timp reâl furnîts da la Rêt FreDNet a son distribuîts cun rispiet dal gnûf sisteme di riferiment ETRF2000(2008.0) doprât dal Istitût Gjeografic Militâr (IGM) pal incuadrament de Rêt Dinamiche Nazionâl taliane (RDN). Chest sisteme al sarà in curt metût sù ancje tai servizis in timp reâl dispensâts da la Rêt A. Marussi ancje se, orepresint, il sisteme in vore al è ETRF89, che la rêt IGM95 e rapresente un so infitiment.

Il caster NTrip pal acès ai servizis di posizionament in timp reâl de rêt A. Marussi si po cjatâlu su http://gnsscaster.regione.fvg.it:8080 o ancje su http://193.43.178.173:8080.
In plui dai mountpoints riferîts a lis stazions GNSS di propietât regjonâl e riassunts ae pagjine Corezions diferenziâls in timp reâl, a son ancje i sot listâts mountpoints leâts a lis stazions de rêt FreDNet.
 

Mountpoint Tipo di soluzione Formato
OGS_ACOM Singola Base - RTK RTCM 2.3
OGS_AFAL Singola Base - RTK  RTCM 2.3
OGS_CODR Singola Base - RTK  RTCM 2.3
OGS_FUSE Singola Base - RTK  RTCM 2.3
OGS_JOAN Singola Base - RTK  RTCM 2.3
OGS_MDEA Singola Base - RTK  RTCM 2.3
OGS_MPRA Singola Base - RTK  RTCM 2.3
OGS_NOVE Singola Base - RTK  RTCM 2.3
OGS_PAZO Singola Base - RTK  RTCM 2.3
OGS_TRIE Singola Base - RTK  RTCM 2.3
OGS_UDI1 Singola Base - RTK  RTCM 2.3
OGS_ZOUF Singola Base - RTK  RTCM 2.3
 

Pal acès gratuît al servizi in timp reâl al è necessari domandâ lis credenziâls di acès (username e password) mandant par mail il modul di domande, oportunementri compilât, di discjamâ te sezion Modulistiche de pagjine Corezions diferenziâls in timp reâl.

  .