Nassude tal 1999 cul obietîf di furnî assistence pe gjeoreferenziazion in sistemis avanzâts di elements gjeografics di posizionâ su la cartografie regjonâl, la Rêt GPS de Regjon FVJ e à rapresentât dal biel principi un imprest essenziâl par ducj chei uficis regjonâi che par competence a scuegnin realizâ misurazions topografichis o localizâ elements rilevants pe gjestion e pe planificazion dal teritori.

Componude tal imprin nome di trê stazions permanentis (cun Palme di pont baricentric regjonâl, Dimpeç e Mueç di ponts di riferiment te aree montagnule), la configurazion de rêt e je stade metude in zornade e completade in fasis seguitivis fintremai a rivâ al asset di cumò cun dîs stazions che a garantissin la complete cuvierture dal teritori regjonâl.
Il prin intervent di inzornament dal 2005 al à implicât un justament tecnic dai ricevidôrs GPS cun chê di disponi di strumentazion evolude, e un inzornament architeturâl e dal software di gjestion. Il miorament de infrastruture tecnologjiche di comunicazion al à rapresentât un altri pont fondamentâl di chel intervent cul garantî che dutis lis stazions permanentis a fossin in conession cul centri di control a mieç di tecnologjie HDSL. Si à rindût disponibii gnûfs servizis su la rêt internet in mût dal dut libar e gratuît par une utence ancje privade (libars professioniscj, tecnics, impresis, universitâts); in particolâr al è stât ativât il servizi di corezion diferenziâl in timp reâl RTK doprant il protocol NTrip.
Te fase di inzornament dal 2007, si è rivâts a une struture a 10 stazions, po lizermentri modificade. E je stade ancje incressude la tipologjie dai servizis pal posizionament in timp reâl metint a disposizion la metodologjie VRS (Virtual Reference Station) che e permet di miorâ lis acuratecis posizionâls des corezions furnidis ai utents de Rêt GPS FVJ.

Vie pal an 2012, la strumentazion e je stade rinovade dal dut slargjant e otimizant lis funzionalitâts de rêt. L’intervent al à permetût a ogni stazion di gjestî, in plui dai dâts de costelazion GPS, sedi GLONASS che GALILEO. I servizis di posizionament in timp reâl a son stâts slargjâts rindint disponibii i “data stream” cun corezion di tipologjie MAC e il formât RTCM 3.1.

Tal Novembar dal 2012 la stazion permanent di Palme e à finide la sô operativitât e e je stade rimplaçade tal Jugn dal 2013 cuntune gnove realizazion a Cervignan.

La Rêt GNSS de Regjon Autonome Friûl-Vignesie Julie "A. Marussi" e je incuadrade tal sisteme gjeodetic nazionâl clamât RDN ETRS89-ETRF2000 dai 24 di Fevrâr dal 2017.
Lis altitudinis a son riferidis a la base de antene "BAM" (Bottom of Antenna Mount).


Si vise che la Regjon Friûl Vignesie Julie e furnìs il servizi de rêt di stazions GNSS permanentis in forme gratuìde. Si risierve ancje la facoltât di fâ, ancje in mancjance di preavîs, ogni possibil modifiche al servizi stes (servizi di intindisi sedi te sô completece, sedi in ogni sô singule part), o ai documents che a’ndi son di corolari, e salacor ancje di suspindi cence preavîs il servizi stes, cence che di un tant cualchidun al puedi lagnâsi par cualsisei dam

  

.